पत्रकार समन्वय समितीच्या आंदोलनासमोर प्रशासनाने टेकले गुडघे; लाक्षणिक उपोषण तूर्तास स्थगित…
DPT NEWS🚨दर्शन पोलीस टाईम🚨प्रतिनिधी – अकिल शहा
साक्री : साक्री पोलीस ठाण्यातील सहाय्यक पोलीस निरीक्षक महेश घायतड यांच्या अरेरावी आणि पत्रकारांशी केलेल्या असभ्य वर्तनाचा मुद्दा अखेर निकाली निघाला आहे. साक्री तालुका पत्रकार समन्वय समितीने पुकारलेल्या तीव्र आंदोलनाला मोठे यश आले असून, संबंधित अधिकाऱ्याची तातडीने साक्री येथून अन्यत्र बदली (उचलबांगडी) करण्यात आली आहे. प्रशासनाने घेतलेल्या या सकारात्मक निर्णयानंतर पत्रकारांनी आपले नियोजित लाक्षणिक उपोषण तूर्तास स्थगित केले आहे.
काही दिवसांपूर्वी साक्री पोलीस ठाण्यात दिव्यांग पत्रकार शैलेश गादेकर यांच्या शारीरिक व्यंगावर टीका करत घायतड यांनी त्यांचा अपमान केला होता. तसेच पत्रकार शरद चव्हाण आणि उमाकांत अहिरराव यांच्याशी अत्यंत शिवराळ भाषेत संवाद साधून, “माझे कोण काय वाकडे करेल?” अशी दर्पोक्ती केली होती. या उर्मट वर्तनामुळे साक्री तालुक्यातील पत्रकारांमध्ये संतापाची लाट उसळली होती.
*प्रशासकीय पातळीवर हालचाली*
या घटनेचे गांभीर्य ओळखून पत्रकार समन्वय समितीने आक्रमक पवित्रा घेतला होता. जिल्ह्याचे पालकमंत्री जयकुमार रावल, खासदार गोवाल पाडवी आणि जिल्हा पोलीस अधीक्षक यांची भेट घेऊन निवेदने देण्यात आली होती व तसेच जन ग्रामीण पत्रकार संघाच्या वतीने हि धुळे जिल्हा पोलिस अधीक्षक श्रीकांत धिवरे यांची भेट घेऊन निवेदन देण्यात आले होते .या पार्श्वभूमीवर, साक्री तहसील कार्यालयात तहसीलदार साहेबराव सोनवणे आणि पोलीस निरीक्षक दीपक वळवी यांच्या उपस्थितीत पत्रकार समन्वय समितीची बैठक पार पडली. या बैठकीत झालेल्या सविस्तर चर्चेअंती आणि वरिष्ठ अधिकाऱ्यांच्या सूचनेनुसार, संबंधित सहाय्यक पोलीस निरीक्षकाची साक्रीतून बदली करण्याचा निर्णय घेण्यात आला.
संबंधित अधिकाऱ्याविरुद्ध ‘दिव्यांग व्यक्ती हक्क अधिनियम’ आणि ‘भारतीय नागरिक सुरक्षा संहिता’ अन्वये गुन्हा दाखल करण्याची मागणी समितीने लावून धरली आहे.
यावेळी खोट्या अॅट्रॉसिटी प्रकरणांवर चर्चा करण्यात आली. तालुक्यात खोट्या अॅट्रॉसिटी गुन्ह्यांचे प्रमाण वाढत असून, पोलिसांनी वस्तुनिष्ठ तपास करावा, अशी मागणीही यावेळी करण्यात आली.
या लढ्यात जिल्हा मराठी पत्रकार संघानेही खंबीर साथ दिली. साक्री तालुका पत्रकार समन्वय समितीचे प्रा. नरेंद्र तोरवणे, विजय भोसले, आबा सोनवणे, जी.टी. मोहिते, पी.झेड. कुवर, जगदीश शिंदे, शरद चव्हाण, शैलेश गादेकर, विद्यानंद पाटील, रवींद्र खैरनार, रतनलाल सोनवणे, अनिल बोराडे, उमाकांत अहिरराव, रघुवीर खारकर, संघपाल मोरे, जितेंद्र जगदाळे, कल्पेश मिस्तरी, सागर काकुस्ते, लतीफ मन्सूरी, अंबादास बेनुस्कर, हेमंत महाले, महेंद्र चंदेल यांच्यासह तालुक्यातील अनेक पत्रकार मोठ्या संख्येने उपस्थित होते.
“प्रशासनाने पत्रकारांच्या भावनेचा आदर करत संबंधित अधिकाऱ्याची पदस्थापना इतरत्र केली आहे. हा सत्याचा आणि पत्रकारांच्या एकजुटीचा विजय आहे. मात्र, कायदेशीर कारवाई पूर्ण होईपर्यंत आमचा पाठपुरावा सुरूच राहील.”
तत्पूर्वी शासकिय विश्राम गृह साक्री येथे पत्रकार समन्वय समितीची बैठक घेण्यात आली.. बैठकीसाठी तालुक्यातील सर्वच पत्रकार उपस्थित होते. यावेळी प्रा. नरेंद्र तोरवणे, विजय भोसले, पी. झेड. कुवर, आबासाहेब सोनवणे, रवि खैरनार, बाबुद्दीन शहा यांनी मार्गदर्शन केले.
