गर्भलिंग तपासणीसह बेकायदेशीर गर्भपाताचे जाळे उघड; टोळीविरुद्ध राज्यातील पहिलीच मोक्का कारवाई .
🚨DPT NEWS🚨दर्शन पोलीस टाईम🚨
प्रतिनिधी — नारायण कांबळे
कोल्हापूर : करवीर ता. मधील बेकायदेशीर गर्भलिंग चाचणी आणि गर्भपाताच्या माध्यमातून धुमाकूळ घालणाऱ्या कथित टोळीविरुद्ध कोल्हापूर पोलिसांनी मोठी कारवाई केली आहे. या टोळीवर महाराष्ट्र संघटित गुन्हेगारी नियंत्रण अधिनियम (MCOCA/मोक्का) अंतर्गत कारवाई करण्यास कोल्हापूर परिक्षेत्राचे विशेष पोलीस महानिरीक्षक रंजनकुमार शर्मा यांनी मंजुरी दिली आहे. अशा प्रकारच्या टोळीवर राज्यातील ही पहिलीच मोक्का कारवाई असल्याचा पोलिसांचा दावा आहे.
करवीर पोलीस ठाण्याच्या हद्दीत स्थानिक गुन्हे अन्वेषण शाखा आणि वैद्यकीय तालुका अधिकारी यांच्या पथकाने भोगावती सहकारी साखर कारखाना, शाहूनगर-परिते येथील ब्लॉक क्रमांक ५, खोली क्रमांक ४ येथे सापळा रचून कारवाई केली होती. या प्रकरणी करवीर पोलीस ठाण्यात गुन्हा क्रमांक ३७०/२०२६ दाखल करण्यात आला आहे. विविध कायद्यांतील कलमांनुसार हा गुन्हा नोंदविण्यात आला असून, १ जुलै २०२६ रोजी वैद्यकीय तालुका आरोग्य अधिकाऱ्यांच्या फिर्यादीवरून कारवाई सुरू झाली.
पोलिसांच्या माहितीनुसार, संबंधित आरोपींकडे कोणतीही वैद्यकीय पदवी अथवा आवश्यक वैद्यकीय शिक्षण नसतानाही जनतेच्या आरोग्यास धोका निर्माण होईल अशा पद्धतीने कथित कृत्ये केली जात होती. या प्रकरणाची गंभीर दखल घेत जिल्हा पोलीस अधीक्षक नीलोत्पल यांनी करवीर पोलीस ठाण्याचे पोलीस निरीक्षक रवींद्र कळमकर यांना आरोपींविरुद्ध कठोर कायदेशीर कारवाईचे निर्देश दिले.
गर्भलिंग चाचणीपासून गर्भपातापर्यंत कथित रॅकेट
तपासादरम्यान आरोपींच्या पूर्वइतिहासाची पाहणी केली असता कोल्हापूर जिल्ह्यातील विविध ठिकाणी अशाच स्वरूपाचे गुन्हे केल्याचे पोलिसांच्या निदर्शनास आले. ही टोळी नियोजनबद्ध पद्धतीने गर्भलिंग निदान आणि बेकायदेशीर गर्भपाताचे गुन्हे करत असल्याचे तपासात समोर आल्याचे पोलिसांनी म्हटले आहे.
पोलिसांच्या म्हणण्यानुसार, टोळीची कथित कार्यपद्धती ठरलेली होती. गर्भवती महिलांना आकर्षित करणे, गर्भलिंग तपासणीसाठी ग्राहक मिळविणे, त्यासाठी बेकायदेशीरपणे सोनोग्राफी मशीनची व्यवस्था करणे, तपासणीसाठी जागा शोधणे आणि अनेकदा संबंधितांच्या घरी जाऊन गर्भलिंग तपासणी करणे, अशी पद्धत वापरली जात होती. गर्भलिंगाची माहिती दिल्यानंतर स्त्रीभ्रूण असल्यास बेकायदेशीर गर्भपाताची व्यवस्था केली जात असल्याचे पोलिसांनी सांगितले.
१० वर्षांत ११ गुन्ह्यांची नोंद
पोलिसांनी दिलेल्या माहितीनुसार, सन २०२० ते २०२६ या कालावधीतील अभिलेख तपासले असता या टोळीशी संबंधित व्यक्तींविरुद्ध बेकायदेशीर गर्भलिंग तपासणी, गर्भपात आणि बोगस डॉक्टर अशा स्वरूपाचे एकूण ११ गुन्हे विविध पोलीस ठाण्यांत दाखल असल्याचे समोर आले.
यामध्ये करवीर पोलीस ठाण्यात ७, जुना राजवाडा पोलीस ठाण्यात १, राधानगरी पोलीस ठाण्यात २ आणि भुदरगड पोलीस ठाण्यात १ गुन्ह्याचा समावेश असल्याचे प्रेस नोटमध्ये नमूद करण्यात आले आहे.
या पार्श्वभूमीवर अपर पोलीस अधीक्षक अण्णासाहेब जाधव आणि करवीर उपविभागीय पोलीस अधिकारी अप्पासो पवार यांच्या मार्गदर्शनाखाली पोलीस निरीक्षक रवींद्र कळमकर यांनी संबंधित टोळीविरुद्ध मोक्का कायद्यांतर्गत कारवाईचा प्रस्ताव पोलीस अधीक्षक कार्यालयाकडे पाठविला.
जिल्हा. पोलीस अधीक्षक नीलोत्पल यांनी प्रस्तावाची छाननी करून तो पुढील कारवाईसाठी कोल्हापूर परिक्षेत्राचे विशेष पोलीस महानिरीक्षक रंजनकुमार शर्मा यांच्याकडे सादर केले. टोळीची गुन्हेगारी पार्श्वभूमी आणि कायदेशीर निकषांची छाननी केल्यानंतर संबंधित टोळीविरुद्ध मोक्का कायद्यांतर्गत कारवाईचे आदेश देण्यात आल्याचे पोलिसांनी सांगितले.
मोक्का कारवाईतील ११ आरोपी
पोलिसांच्या प्रेस नोटनुसार, या कारवाईतील आरोपी
स्वप्निल केरबा पाटील (वय ३५), रा. जयभवानी तरुण मंडळाजवळ, बालिंगा, ता. करवीर, जि. कोल्हापूर — टोळीप्रमुख असल्याचे नमूद.
महेश सुबराव पाटील (वय ३५), रा. सिरसे, ता. राधानगरी, जि. कोल्हापूर.
श्रीमंत तानाजी पाटील (वय ३७), रा. परिते, ता. करवीर, जि. कोल्हापूर.
विजय लक्ष्मण कोळसकर (वय ३९), रा. मडिलगे खुर्द, ता. भुदरगड, जि. कोल्हापूर.
प्रशांत वसंत जाधव, रा. सीबीबी ४२५, वैभवनगर, बेळगाव, कर्नाटक.
दत्तात्रय कृष्णात पाटील, रा. सिरसे, ता. राधानगरी, जि. कोल्हापूर.
ओंकार गोरखनाथ कराळे (वय ३०), रा. सडोली खालसा, ता. करवीर, जि. कोल्हापूर.
सुनिल प्रकाश पाटील (वय ३८), रा. सिरसे, ता. राधानगरी, जि. कोल्हापूर.
अनिल प्रकाश टिपुगडे (वय ४०), रा. भोगावती साखर कारखाना कॉलनी, ब्लॉक क्र. ५, खोली क्र. ४, भोगावती, ता. करवीर, जि. कोल्हापूर. मूळ रा. टिपुगडे गल्ली, दडपे वाडी, शिरगाव, कोल्हापूर.
शिवप्रसाद सत्याप्पा महादेव पाटील (वय ४०), रा. शिवगंगा अपार्टमेंट, आयजीएम हॉस्पिटलजवळ, इचलकरंजी, जि. कोल्हापूर.
अश्विनी गजानन शिंदे (वय ३८), रा. कसबा वाळवे, ता. राधानगरी, जि. कोल्हापूर.
या कारवाईमुळे बेकायदेशीर गर्भलिंग तपासणी आणि गर्भपाताच्या माध्यमातून सुरू असलेल्या कथित नेटवर्कला मोठा धक्का बसला आहे. प्रकरणाचा पुढील तपास करवीर पोलीस करत असून, टोळीचे आणखी गुन्हे आणि या प्रकरणाशी संबंधित इतर व्यक्तींचा सहभाग तपासातून समोर येण्याची शक्यता आहे.
या कारवाईत कोल्हापूर परिक्षेत्राचे विशेष पोलीस महानिरीक्षक रंजनकुमार शर्मा, जिल्हा पोलीस अधीक्षक नीलोत्पल, अपर पोलीस अधीक्षक अण्णासाहेब जाधव, करवीर उपविभागीय पोलीस अधिकारी अप्पासो पवार, स्थानिक गुन्हे शाखेचे पोलीस निरीक्षक सुशांत चव्हाण, करवीर पोलीस ठाण्याचे पोलीस निरीक्षक रवींद्र कळमकर, सहायक फौजदार राहुल देसाई, पोलीस कॉन्स्टेबल अविनाश कांबळे तसेच स्थानिक गुन्हे शाखेचे सहायक फौजदार सचिन पाटील आणि त्यांच्या पथकाचा सहभाग होता.
