🚨DPT NEWS🚨दर्शन पोलीस टाईम🚨
प्रतिनिधी साईनाथ खंडेराय
नांदेड :- नांदेड जिल्ह्यातील गंभीर स्वरूपाच्या गुन्ह्यांतील फरार आरोपींचा शोध घेऊन त्यांना अटक करण्याचे निर्देश पोलीस अधीक्षक मा. डॉ. नीलाभ रोहन यांनी दिले होते. त्या अनुषंगाने स्थानिक गुन्हे शाखेच्या पथकाने धडक कारवाई करत बारड पोलीस ठाण्यातील जबरी चोरीच्या गुन्ह्यातील एका फरार आरोपीला जेरबंद केले आहे.
मोनार्क कॅन्सर हॉस्पिटल परिसरात सापळा
स्थानिक गुन्हे शाखेचे पोउपनि साईनाथ पुयड व त्यांचे पथक वजिराबाद पोलीस ठाण्याच्या हद्दीत गस्त घालत असताना, गोपनीय बातमीदाराकडून बातमी मिळाली की बारड पोलीस ठाण्यातील गुन्हा रजि. नं. ११३/२०२५ (भारतीय न्याय संहिता कलम ३०९(६), ३१०, ३१२) मधील फरार आरोपी आकाश प्रकाश मोकळे हा चोरीचा मोबाईल विक्री करण्याच्या उद्देशाने मोनार्क कॅन्सर हॉस्पिटल परिसरात फिरत आहे.
प्राप्त माहितीच्या आधारे पोलिसांनी पंचांसमक्ष या परिसरात सापळा रचून धाड टाकली. तेथे संशयास्पद हालचाली करणाऱ्या एका तरुणाला ताब्यात घेण्यात आले.
१५ हजार रुपयांचा मोबाईल जप्त
ताब्यात घेतलेल्या इसमाने आपले नाव आकाश प्रकाश मोकळे (वय २४ वर्षे, रा. नेरली, ता. जि. नांदेड, व्यवसाय- मजुरी) असे सांगितले. त्याची अंगझडती घेतली असता त्याच्याकडे Vivo कंपनीचा पांढऱ्या रंगाचा अँड्रॉइड मोबाईल (अंदाजे किंमत ₹१५,०००/-) मिळून आला. अधिक चौकशी केली असता, हा मोबाईल बारड पोलीस ठाण्याच्या हद्दीतील जबरी चोरीच्या गुन्ह्यातील असल्याचे स्पष्ट झाले.
स्कूटीवरील व्यक्तीला चाकूने मारहाण करून लुटले होते
पोलीस चौकशीदरम्यान आरोपीने कबुली दिली की, त्याने आणि त्याच्या साथीदारांनी—
प्रेम नागेश हटकर
मयूर उर्फ मोनू लापेरा (रा. झेंडा चौक)
अर्पण आटे (रा. सांगवी)
अनिकेत साहेबराव नरवाडे (रा. छत्रपती चौक, नांदेड)
या सर्वांनी मिळून बारड येथील आंबेगाव पाटीवर स्कूटीवरून येणाऱ्या एका व्यक्तीला अडवून चाकूने मारहाण केली होती आणि त्याचा मोबाईल फोन व स्कूटी हिसकावून फरार झाले होते.
पुढील कारवाई सुरू
अटक करण्यात आलेल्या आरोपीस पुढील कायदेशीर कारवाईसाठी बारड पोलीस ठाण्याच्या ताब्यात देण्यात आले असून, गुन्ह्यातील उर्वरित फरार साथीदारांचा शोध पोलीस घेत आहेत.
ही कामगिरी पोलीस अधीक्षक मा. डॉ. नीलाभ रोहन यांच्या आदेशाने, स्थानिक गुन्हे शाखेचे पोलीस निरीक्षक अतुल भोसले यांच्या मार्गदर्शनाखाली पोउपनि साईनाथ पुयड, पोलीस अंमलदार बालाजी कदम, इम्रान शेख, प्रमोद जोंधळे, संतोष बेल्लुरोड, रवी हराळे, संदीप धोंगडे आणि अमोल घेवारे यांच्या पथकाने केली आहे.
