🚨DPT NEWS🚨दर्शन पोलीस टाईम 🚨
प्रतिनिधी – निवास गागडे
इचलकरंजी :- लोकशाहीर, साहित्यरत्न डॉ. अण्णाभाऊ साठे यांच्या १०६ व्या जयंतीनिमित्त कुर्ली येथे मातंग समाजाच्या वतीने आयोजित करण्यात आलेला व्याख्यान कार्यक्रम उत्साहपूर्ण वातावरणात पार पडला. अण्णाभाऊ साठे यांच्या साहित्य, सामाजिक संघर्ष, समता, स्वाभिमान, शिक्षण आणि सामाजिक न्यायाच्या विचारांचा जागर या कार्यक्रमातून करण्यात आला.
कार्यक्रमाच्या प्रारंभी मान्यवरांच्या हस्ते दीपप्रज्वलन करण्यात आले. त्यानंतर भारतरत्न डॉ. बाबासाहेब आंबेडकर आणि साहित्यरत्न लोकशाहीर डॉ. अण्णाभाऊ साठे यांच्या प्रतिमांना पुष्पहार अर्पण करून अभिवादन करण्यात आले.यावेळी प्रमुख वक्ते प्रा. प्रकाश नाईक (सरोड) यांनी अण्णाभाऊ साठे यांच्या जीवनकार्यावर सविस्तर प्रकाश टाकला. प्रतिकूल परिस्थितीवर मात करून अण्णाभाऊंनी आपल्या साहित्य आणि शाहिरीच्या माध्यमातून समाजातील वंचित, शोषित आणि कष्टकरी घटकांच्या प्रश्नांना वाचा फोडली. त्यांच्या साहित्यामध्ये सामाजिक समता, बंधुता, स्वाभिमान आणि न्यायाची भूमिका ठळकपणे दिसून येते, असे प्रा. नाईक यांनी सांगितले. अण्णाभाऊ साठे यांचे विचार केवळ एका समाजापुरते मर्यादित नसून ते संपूर्ण समाजाला प्रेरणा देणारे आहेत. आजच्या पिढीने त्यांच्या साहित्याचा अभ्यास करून शिक्षण, संघटन आणि सामाजिक प्रबोधनाला प्राधान्य देणे गरजेचे आहे, असेही त्यांनी आपल्या व्याख्यानातून स्पष्ट केले.
कार्यक्रमास डॉ. बाबासाहेब आंबेडकर विचार मंच, निपाणीचे संस्थापक अध्यक्ष प्रा. सुरेश कांबळे, बेळगाव जिल्हा दलित महासंघाचे अध्यक्ष भरत रोंड्डे, कर्नाटक दलित संघर्ष समिती (रजि.) चिक्कोडी जिल्हाध्यक्ष सुभाष सणदी, सामाजिक कार्यकर्ते योगेश दाभाडे, निपाणी तालुका दलित महासंघाचे अध्यक्ष दत्ता माने, कर्नाटक दलित संघर्ष समिती (रजि.) चिक्कोडी तालुकाध्यक्ष अजित मेत्री, निपाणी तालुकाध्यक्ष लक्ष्मण माने, मादर महासभेचे उपाध्यक्ष शंकर कांबळे, चिक्कोडी तालुक्यातील समाजाचे नेते जयपाल आयहोळे यांच्यासह समाजसेवक अंकुश कवाळे, दीपक केगारे, अनिल हेगडे तसेच विविध क्षेत्रातील मान्यवर, समाजबांधव आणि कार्यकर्ते मोठ्या संख्येने उपस्थित होते.
या कार्यक्रमातून अण्णाभाऊ साठे यांच्या ‘समता, स्वाभिमान, शिक्षण आणि सामाजिक न्याय’ या विचारांचा संदेश समाजापर्यंत पोहोचविण्यात आला. समाजातील ऐक्य मजबूत करण्यासोबतच युवकांनी शिक्षणाच्या माध्यमातून प्रगती साधावी आणि सामाजिक प्रबोधनाची चळवळ पुढे न्यावी, असा संदेशही यावेळी देण्यात आला.
अण्णाभाऊ साठे यांच्या जयंतीनिमित्त आयोजित या कार्यक्रमाला नागरिकांचा उत्स्फूर्त प्रतिसाद मिळाला. कार्यक्रमाच्या माध्यमातून सामाजिक एकता आणि प्रबोधनाचा जागर निर्माण झाल्याचे दिसून आले.
