DPT NEWS NETWORK 🚨 दर्शन पोलीस टाईम 🚨 प्रतिनिधी साकिब सैय्यद
साक्री: साक्री तालुक्यातील निजामपूर पोलीस स्टेशन हद्दीत येणाऱ्या भडगाव रस्त्यावरील ठेंभे फाट्या जवळ एका २५ वर्षीय विवाहित तरुणीचा मृतदेह आढळून आल्याने परिसरात प्रचंड खळबळ उडाली आहे. जयश्री रजनीकांत काकूस्ते (वय २५, रा. कसारे, ता. साक्री) असे मृत तरुणीचे नाव आहे. या घटनेबाबत अनेक तर्कवितर्क लावले जात असून निजामपूर पोलिसांनी घटनेचा तपास सुरू केला आहे.
ऑफिसच्या कामावरून परतताना बेपत्ता
मिळालेल्या प्राथमिक माहितीनुसार, मृत जयश्री काकूस्ते ही साक्री येथील ‘बजाज फायनान्स’ ऑफिसमध्ये नोकरीला होती. ती पती व एका लहान बाळासह राहत होती. काल ती ऑफिसच्या कामानिमित्त छडवेल येथे गेली होती. रात्री १० वाजेच्या सुमारास तिच्या पतीने तिला फोन केला असता, “मी घरी येत आहे, मला साक्री येथे घ्यायला या,” असे तिने पतीला सांगितले.
पत्नीच्या सांगण्यावरून पती तिला घेण्यासाठी साक्री येथे पोहोचला. मात्र, तिथे गेल्यावर पतीने पुन्हा जयश्रीच्या मोबाईलवर संपर्क साधण्याचा प्रयत्न केला, तसा तिचा मोबाईल स्विच ऑफ (बंद) येत होता. रात्री उशिरापर्यंत शोध घेऊनही तिचा कुठेही पत्ता लागला नाही.
सकाळी मृतदेह आढळल्याने खळबळ
आज सकाळी भडगाव रस्त्यावरील ठेंभे फाट्या जवळ एका तरुणीचा मृतदेह पडलेला असल्याचे काही ग्रामस्थांच्या निदर्शनास आले. ग्रामस्थांनी तातडीने निजामपूर पोलीस स्टेशनचे सहाय्यक पोलीस निरीक्षक (API) मयूर भामरे यांना फोन करून या घटनेची माहिती दिली. पोलिसांनी तात्काळ पथकासह घटनास्थळी धाव घेतली.
घटनास्थळावरील परिस्थितीमुळे संशय वाढला
या घटनेत अनेक संशयास्पद बाबी समोर येत आहेत:
गाडी सुरक्षित: जयश्रीच्या ताब्यातील सुझुकी ॲक्सेस (Suzuki Access) दुचाकीला साधी खरचट देखील पडलेली नाही, गाडी व्यवस्थित स्थितीत आहे.
वस्तू जागेवर: मृतदेहाजवळच तिची पर्स आणि मोबाईल जश्या तश्या स्थितीत मिळून आले आहेत.
पोलिसांचा तपास सुरू:
अपघाताचे कोणतेही दृश्य चिन्ह नसताना तरुणीचा मृतदेह रस्त्याच्या कडेला आढळल्याने मृत्यूबाबत गूढ वाढले आहे. निजामपूर पोलीस ठाण्याचे API मयूर भामरे आणि स्थानिक गुन्हे शाखा यांचे पथक घटनास्थळाचा पंचनामा करत असून, मृतदेह शवविच्छेदनासाठी पाठवण्यात आला आहे. हा घातपात आहे की अन्य काही कारण, याचा शोध पोलीस घेत आहेत.
