करवीर पोलिसांची मोठी कारवाई; १३.६९ लाखांचा मुद्देमाल जप्त, दोन तस्कर जेरबंद
DPT NEWS NETWORK🚨 दर्शन पोलीस टाईम🚨प्रतिनिधी – आनंद कांबळे
कोल्हापूर : करवीर पोलिस ठाण्याच्या गुन्हे शोध पथकाने अवैधरित्या देशी-विदेशी दारूची वाहतूक करणाऱ्या दोन इसमांवर धडक कारवाई करत तब्बल १३ लाख ६९ हजार ५७५ रुपयांचा मुद्देमाल जप्त केला आहे. या कारवाईत दारूसह दोन वाहनेही ताब्यात घेण्यात आली आहेत.
पोलीस अधीक्षक नीलोत्पल यांच्या आदेशानुसार जिल्ह्यात सुरू असलेल्या अवैध धंद्यांविरोधातील मोहिमेत करवीर पोलिसांना ही मोठी यशस्वी कारवाई करता आली. गुप्त माहितीच्या आधारे कळंबा परिसरात सापळा रचून एका चारचाकी वाहनातून ३१ हजार ८०० रुपयांची विदेशी दारू जप्त करण्यात आली. याप्रकरणी शहाजी साताप्पा बर्गे (वय ४८ रा. अर्जुनवाड) याला ताब्यात घेण्यात आले.
त्यानंतर मिळालेल्या दुसऱ्या माहितीवरून नवीन वाशी नाका परिसरात टेम्पो अडवून तपासणी केली असता त्यामधून २ लाख ७७ हजार ७७५ रुपयांची देशी-विदेशी दारू आढळून आली. याप्रकरणी मुबीन अजिज शेख (वय २६ रा. शिवाजीनगर, पुलाची शिरोली) याला अटक करण्यात आली.
दोन्ही कारवायांमध्ये दारूसह चारचाकी वाहन व टेम्पो असा एकूण १३ लाख ६९ हजार ५७५ रुपयांचा मुद्देमाल जप्त करण्यात आला आहे. पोलिसांनी दोन्ही आरोपींविरुद्ध गुन्हे दाखल केले असून पुढील तपास सुरू आहे.
या धडक कारवाईमुळे अवैध दारू व्यवसायिकांचे धाबे दणाणले असून, जिल्ह्यातील अवैध धंद्यांविरोधातील पोलिसांची मोहीम आणखी तीव्र होणार असल्याचे संकेत मिळत आहेत.
