DPT NEWS NETWORK🚨 दर्शन पोलीस टाईम🚨प्रतिनिधी : राजेंद्र पवार
मिरज:- शहरातील मंगळवार पेठ परिसरात मंगळवारी सकाळी एक धक्कादायक अपघात घडला. बॉम्बे स्टार बेकरीसमोर टर्न घेत असताना चारचाकी वाहनावरील चालकाचा ताबा सुटल्याने वाहनाने प्रथम एका दुचाकीला धडक दिली आणि त्यानंतर थेट एका घरात घुसल्याची घटना घडली.
मिळालेल्या माहितीनुसार, सकाळी अंदाजे ९ ते ९.३० वाजण्याच्या सुमारास हा अपघात झाला. चारचाकी वाहन वळण घेत असताना चालकाचे नियंत्रण सुटल्याने वाहन भरधाव वेगाने पुढे गेले. यावेळी रस्त्याच्या कडेला उभ्या असलेल्या दुचाकीला जोरदार धडक बसली. त्यानंतर वाहन थेट समोरील घरात घुसल्याने परिसरात एकच खळबळ उडाली.
या अपघातात घरमालक इम्तियाज सौदागर यांच्या घराचे व मालमत्तेचे मोठ्या प्रमाणात नुकसान झाले आहे. मात्र, अपघाताच्या वेळी घरात अथवा परिसरात कोणीही वाहनाच्या मार्गात नसल्याने कोणतीही जीवितहानी झाली नाही. त्यामुळे मोठा अनर्थ टळल्याची भावना नागरिकांनी व्यक्त केली.
घटनेनंतर परिसरात नागरिकांची मोठी गर्दी झाली होती. माहिती मिळताच वाहतूक शाखेचे पोलीस तसेच मिरज शहर पोलीस घटनास्थळी दाखल झाले. पोलिसांनी पंचनामा करून पुढील तपास सुरू केला आहे.
दरम्यान, घरमालक इम्तियाज सौदागर यांनी झालेल्या नुकसानीची भरपाई मिळावी, तसेच नुकसानीचा योग्य पंचनामा करून न्याय द्यावा, अशी मागणी प्रशासनाकडे केली आहे.
