DPT NEWS NETWORK 🚨 दर्शन पोलीस टाईम 🚨 प्रतिनिधी – रमजान मुलानी
सांगली :- तासगाव शहरातील दोन अल्पवयीन मैत्रिणी अचानक बेपत्ता झाल्याने परिसरात खळबळ उडाली आहे. अज्ञात व्यक्तीने फूस लावून त्यांना पळवून नेल्याचा संशय व्यक्त करण्यात आला असून तासगाव पोलिस ठाण्यात अपहरणाचा गुन्हा दाखल करण्यात आला आहे. पोलिसांकडून मुलींचा शोध घेण्यासाठी विशेष पथके कार्यरत करण्यात आली आहेत.
मिळालेल्या माहितीनुसार, शहरातील पेठ परिसरात राहणाऱ्या आणि अनुक्रमे 10 वी व 11 वी इयत्तेत शिक्षण घेणाऱ्या दोन अल्पवयीन मैत्रिणी 19 जून रोजी दुपारच्या सुमारास घराबाहेर पडल्या होत्या. त्यानंतर त्या परत न आल्याने कुटुंबीयांनी त्यांचा सर्वत्र शोध घेतला. नातेवाईक, मित्रपरिवार तसेच विविध ठिकाणी चौकशी करूनही त्यांचा कोणताही ठावठिकाणा लागला नाही.
मुलींचा शोध निष्फळ ठरल्यानंतर कुटुंबीयांनी तासगाव पोलिस ठाण्यात धाव घेत तक्रार दाखल केली. राहुल नामदेव बागल यांनी दिलेल्या फिर्यादीवरून अज्ञात व्यक्तीविरोधात अपहरणाचा गुन्हा नोंदविण्यात आला आहे. दोन्ही मुली अल्पवयीन असल्यामुळे या प्रकरणाकडे अत्यंत गांभीर्याने पाहिले जात असून अज्ञात व्यक्तीने फूस लावून त्यांना पळवून नेल्याचा संशय व्यक्त करण्यात येत आहे.
या घटनेमुळे तासगाव शहरासह परिसरात चिंतेचे वातावरण निर्माण झाले आहे. पालकांमध्ये भीतीचे वातावरण असून मुलांच्या सुरक्षिततेबाबत प्रश्न उपस्थित होत आहेत. पोलिसांनी सीसीटीव्ही फुटेज, मोबाईल कॉल रेकॉर्ड तसेच तांत्रिक तपासाच्या माध्यमातून मुलींचा माग काढण्याचे प्रयत्न सुरू केले आहेत.
तासगाव पोलिसांनी नागरिकांना आवाहन केले आहे की, संबंधित मुलींबाबत कोणतीही माहिती मिळाल्यास त्वरित पोलिस ठाण्याशी संपर्क साधावा. तपासाची चक्रे वेगाने फिरत असून मुलींचा सुरक्षित शोध घेण्यासाठी सर्वतोपरी प्रयत्न सुरू असल्याची माहिती पोलिसांकडून देण्यात आली आहे.
