🚨DPT NEWS🚨दर्शन पोलीस टाईम🚨
प्रतिनिधी संदीप अहिरे
धुळे: मा. अन्न सुरक्षा आयुक्त तुकाराम मुंडे यांच्या आदेशानुसार धुळे जिल्हा अन्न आणि औषध प्रशासनाने (FDA) अन्न सुरक्षा व स्वच्छतेच्या अनुषंगाने शहरात विशेष तपासणी मोहीम राबवली. या मोहिमेदरम्यान विविध अन्न आस्थापनांवर छापे टाकून भेसळीच्या संशयावरून सुमारे ३ लाख २६ हजार रुपये किमतीचा अन्नधान्य व मिठाईचा साठा जप्त करण्यात आला आहे.
कारवाईचा तपशील:
- मे. गायत्री ट्रेडर्स (कुमार नगर, साक्री रोड): या दुकानाची तपासणी करून गाईचे व म्हशीचे तूप या अन्नपदार्थांचे नमुने विश्लेषणासाठी घेण्यात आले. भेसळीच्या संशयावरून ४६३ किलो तूप (किंमत रु. ३,००,८००/-) जप्त करण्यात आले.
- मे. रियल गृह उद्योग (कुमार नगर, साक्री रोड): या आस्थापनेची तपासणी करून बुंदी व बुंदीचे लाडू यांचे नमुने घेण्यात आले असून १५८ किलो साठा (किंमत रु. २५,२००/-) संशयावरून जप्त करण्यात आला.
संकलित केलेले सर्व नमुने अधिकृत प्रयोगशाळेत विश्लेषणासाठी पाठवण्यात आले असून, प्रयोगशाळेचा अहवाल प्राप्त झाल्यानंतर संबंधितांवर कायद्यानुसार पुढील कडक कारवाई केली जाईल, अशी माहिती प्रशासनाने दिली आहे.
सदर धडक कारवाई सहायक आयुक्त (अन्न) गोपाल माहोरे यांच्या मार्गदर्शनाखाली अन्न सुरक्षा अधिकारी आनंद पवार, अरविंद राऊत आणि मंगेश भावसार यांच्या पथकाने केली. नागरिकांना सुरक्षित, गुणवत्तापूर्ण व भेसळमुक्त अन्न उपलब्ध करून देण्यासाठी अशा प्रकारची तपासणी सत्र यापुढेही सातत्याने सुरू राहील, असा इशारा अन्न सुरक्षा विभागाने दिला आहे.
