🚨DPT NEWS🚨दर्शन पोलीस टाईम🚨
प्रतिनिधी अकिल शहा
साक्री :- देवनगर (ता. साक्री) गावाजवळून जाणाऱ्या राष्ट्रीय महामार्ग क्रमांक ६ वर पादचाऱ्यांसाठी तातडीने भुयारी मार्ग (अंडरपास) किंवा सुरक्षित क्रॉसिंगची निर्मिती करण्यात यावी, अशी मागणी सिद्धांत महाविद्यालय प्रशासन व देवनगर-पंढरपूर येथील ग्रामस्थांच्या वतीने साक्री मतदारसंघाच्या आमदार मंजुळाताई गावित यांच्याकडे निवेदनाद्वारे करण्यात आली आहे.
काही महिन्यांपूर्वी पंढरपूर गावातील काही वृद्ध महिला व पुरुषांचा रस्ता ओलांडताना अज्ञात वाहनाच्या धडकेत दुर्दैवी मृत्यू झाला होता. अशा अपघातांची पुनरावृत्ती टाळण्यासाठी आणि निष्पाप ग्रामस्थ व शालेय विद्यार्थ्यांचे प्राण वाचवण्यासाठी या भागात सुरक्षित भुयारी मार्गाची अत्यंत गरज असल्याचे निवेदनात म्हटले आहे.
विद्यार्थी आणि ग्रामस्थांचा जीव धोक्यात
२८८ विद्यार्थ्यांची सुरक्षा टांगणीला: देवनगरच्या उत्तरेस पंढरपूर शिवारात असलेल्या सिद्धांत महाविद्यालयात धुळे, नंदुरबार व साक्री परिसरातून सुमारे २८८ विद्यार्थी शिक्षणासाठी येतात.
अपघाताची दाट शक्यता: राष्ट्रीय महामार्गावरील भरधाव वाहनांमुळे विद्यार्थी, पालक आणि शिक्षकांना जीव मुठीत धरून रस्ता ओलांडावा लागतो. विशेषतः सकाळी, दुपारी आणि संध्याकाळी गर्दीच्या वेळी ही समस्या अधिक गंभीर बनते.
नवा अंडरपास देवनगरजवळ हवा: शेवाळी चौफुली जवळील हॉटेल कृष्णा गार्डनजवळ प्रस्तावित असलेला उपरस्ता हा महाविद्यालय व पंढरपूर गावासाठी सोयीचा नाही. त्यामुळे देवनगरजवळील इंडियन ऑईल पेट्रोल पंपासमोर स्वतंत्र अंडरपास तयार करण्यात यावा, अशी मागणी ग्रामस्थांनी केली आहे.
आ. मंजुळाताई गावित यांचे आश्वासन
आमदार मंजुळाताई गावित यांनी गावकऱ्यांचे निवेदन स्वीकारून, या संवेदनशील प्रश्नाबाबत संबंधित विभागाकडे तत्परतेने पाठपुरावा करण्याचे आश्वासन दिले आहे.
निवेदन देताना उपस्थित मान्यवर
यावेळी अंबापूरचे सरपंच साहेबराव बोरकर, भाडण्याचे सरपंच अजय सोनवणे, शिवसेना शाखाप्रमुख सुरेश कारंडे, आरपीआय तालुकाध्यक्ष कमलाकर मोहिते, आरपीआय प्रदेशाध्यक्ष हेमंत वाघ, शिवसेना उपशहर प्रमुख बाळा शिंदे, महाविद्यालयाचे संस्थापक प्रवीण सोनवणे यांच्यासह देवनगर व पंढरपूर येथील ग्रामस्थ मोठ्या संख्येने उपस्थित होते.
