🚨DPT NEWS🚨दर्शन पोलीस टाईम🚨
खेड (पुणे): मौजमजा करण्यासाठी मोटारसायकलची चोरी करणाऱ्या एका सराईत टोळीला खेड पोलीस ठाण्याच्या ‘डीबी’ (DB) पथकाने बेड्या ठोकल्या आहेत. पोलिसांनी आरोपींकडून १७ मोटारसायकल जप्त केल्या असून, एकूण १४ चोरीचे गुन्हे उघडकीस आणले आहेत.
घटना काय आहे?
०८ जून २०२४ रोजी निमगाव खंडोबा येथील बैलगाडा शर्यत पाहण्यासाठी आलेल्या एका नागरिकाची ‘स्प्लेडर’ मोटारसायकल (क्र. MH 12 TE 9468) अज्ञात चोराने चोरून नेली होती. याप्रकरणी खेड पोलीस ठाण्यात गुन्हा दाखल करण्यात आला होता.
तपासादरम्यान, जिल्हा वाहतूक शाखा बारामती युनिटचे पोलीस अंमलदार दत्तात्रय भोसले आणि आकाश कांबळे यांना ही चोरीची गाडी संशयास्पदरीत्या आढळली. त्यांनी ई-चालान मशिनवर तपासणी केली असता सदर गाडी खेड पोलीस ठाण्याच्या गुन्ह्यातील असल्याचे निष्पन्न झाले. त्यांनी तात्काळ खेड पोलिसांना याबाबत माहिती दिली.
आरोपींना अटक आणि पोलिसी खाक्या
घटनेचे गांभीर्य ओळखून खेड पोलिसांच्या पथकाने सापळा रचून आरोपींना ताब्यात घेतले.
अटक करण्यात आलेले आरोपी:
१. रोहित आप्पासाहेब कानगुडे (वय २२ वर्षे, रा. नांदगाव, ता. कर्जत, जि. अहिल्यानगर)
२. चंद्रशेखर अनिल पवार (वय २२ वर्षे, रा. नांदगाव, ता. कर्जत, जि. अहिल्यानगर)
पोलीस कस्टडीदरम्यान करण्यात आलेल्या सखोल चौकशीत आरोपींनी मौजमजेसाठी दुचाकी चोरी केल्याची कबुली दिली. त्यांच्याकडून १७ दुचाकी जप्त करण्यात आल्या आहेत.
विविध पोलीस ठाण्यांतील १४ गुन्हे उघड
या कारवाईमुळे खेड, शिक्रापूर, पारगाव, मंचर, महाळुंगे उत्तर आणि वडुज पोलीस ठाण्याच्या हद्दीतील तब्बल १४ गुन्हे उघडकीस आले आहेत.
कारवाई करणारे पथक
ही कामगिरी पुणे ग्रामीणचे पोलीस अधीक्षक श्री. संदीप सिंह गिल, अप्पर पोलीस अधीक्षक डॉ. शुभम कुमार, उपविभागीय पोलीस अधिकारी श्री. अमोल मांडवे यांच्या मार्गदर्शनाखाली खेड पोलीस ठाण्याचे पोलीस निरीक्षक सुभाष चव्हाण, सहाय्यक पोलीस निरीक्षक अभिजित कुडले, पोलीस उपनिरीक्षक श्रीकांत गोडगे, महेश गरुड व डीबी पथकातील कर्मचाऱ्यांनी केली आहे.
