सलग सहाव्या वर्षी वारकऱ्यांसाठी भव्य सेवा शिबिर; हजारो भाविकांना मोफत सुविधा, सेवाभावाला सलाम
🚨DPT NEWS🚨दर्शन पोलीस टाईम🚨
मिरज प्रतिनिधी-राजेंद्र पवार
मिरज : आषाढी वारी… लाखो वारकऱ्यांच्या ओठी विठ्ठल नामाचा गजर आणि पावलोपावली भक्तीचा उत्सव! या पवित्र सोहळ्यात “सेवा हाच खरा धर्म” या उदात्त विचाराने प्रेरित होत रॉयल कारभार प्रतिष्ठान, महाराष्ट्र यांनी सलग सहाव्या वर्षी वारकऱ्यांसाठी भव्य सेवा शिबिराचे आयोजन करून मानवतेचा एक आदर्श समाजासमोर उभा केला.
वारीच्या प्रवासात ऊन, पाऊस, थकवा आणि शारीरिक वेदना यांचा सामना करणाऱ्या वारकऱ्यांसाठी या शिबिरात रेनकोट, पौष्टिक शेंगदाणा लाडू, चिक्की, बिस्किटे, पिण्याच्या पाण्याच्या बाटल्या यांचे मोफत वितरण करण्यात आले. यासोबतच मोफत आरोग्य तपासणी, औषधोपचार, जखमांवर ड्रेसिंग, चरण सेवा आणि आपत्कालीन परिस्थितीसाठी मोफत रुग्णवाहिका सेवा उपलब्ध करून देण्यात आली. या सेवेमुळे असंख्य वारकऱ्यांना मोठा दिलासा मिळाला.
या भव्य सेवा उपक्रमासाठी श्वास फाउंडेशन, पुणे आणि आझाद पंछी ग्रुप, मिरज यांचे मोलाचे सहकार्य लाभले.
यावेळी आझाद पंछी ग्रुपचे अध्यक्ष प्रोफेसर सगरे सर, रॉयल कारभार प्रतिष्ठानचे संस्थापक अध्यक्ष शुभम सगरे यांच्या नेतृत्वाखाली सेवा कार्य पार पडले. तसेच एमएसआय ब्लड सेंटरची संपूर्ण टीम आणि प्रतिष्ठानचे सुशांत गणेशवाडी, रामू मालेदार, जगदीश माने, निलेश शिंदे, शीतल व्हन्नुरे, सागर पाटोळे, ओम सरगर, संतोष नांगरे, अमेय कोले यांनी वारकऱ्यांची मनोभावे सेवा केली.
या सेवा शिबिराला दर्शन पोलीस टाईमचे सांगली जिल्हा प्रतिनिधी श्री. रमजान मुलाणी तसेच मिरज प्रतिनिधी श्री. राजेंद्र पवार यांनी सदिच्छा भेट देऊन आयोजकांचे अभिनंदन केले. त्यांनी या सेवाभावी कार्याचे कौतुक करत, अशा उपक्रमांमुळे समाजात माणुसकी, सहकार्य आणि सेवाभाव अधिक दृढ होत असल्याचे मत व्यक्त केले.
भक्ती, सेवा आणि सामाजिक बांधिलकीचा संगम घडवणारा रॉयल कारभार प्रतिष्ठानचा हा सेवा महायज्ञ वारकऱ्यांसाठी वरदान ठरला असून, “विठ्ठलाच्या भक्तांची सेवा म्हणजेच विठ्ठलाची सेवा” हा संदेश या उपक्रमातून समाजापर्यंत प्रभावीपणे पोहोचला. सेवाभावाच्या या अखंड परंपरेला वारकरी आणि नागरिकांनी मनापासून सलाम केला.
